Den årvisse og tradisjonsrike lagtevlinga Spring Fours gjekk nyleg av stabelen i Bristol i England. For fyrste gong på lenge var tevlinga fullteikna, med 64 lag på startstreken, mange av dei særs gode.

Heilt til finalen kom det irske lag Barton og det amerikanske lag Schnelwar. Barton vann tevlinga i fjor. Amerikanarane Joe Grue, Vincent Demuy, Zachary Grossack og Adam Kaplan er openbert på øvste internasjonale hylle, men då dei òg hadde den meir upolerte spelande sponsoren Susan Schnelwar med seg, verka det på førehand som eit nokså ope oppgjer.

Mykje av det ein gjer ved bridgebordet skjer nærast på autopilot, og i mange tilfelle kan det gå bra. Men det hender òg at den raske og lettvinte bridgen kostar mange poeng. Her er eit døme frå Berkåk BK sin årvisse påskecup i Soknedal. Kva hadde du gjort i motspel?