Nøyaktig kva nord meinte med 2 spar er litt uklårt, men kontrakten vart no iallfall 5 ruter. Med kløver seks ut, kva tenkjer du om spelet?
Tilsynelatande har du ein hjartertapar i tillegg til spartaparen, så har du nokre andre sjansar enn at utspelet er frå kløver konge?
Tja, veldig gode er ikkje sjansane. Men det vil vera særs uklokt å sleppe kløveren, som nesten garantert er ein singelton når vest melde 4 hjarter, som indikerer at han har sekskorts hjarter i tillegg til minst fem spar.
Håpet ditt ligg i at vest verkeleg har «alt» i major. Då kan han skvisast. Om han ikkje har det, kan det jo òg finnast eit visst håp om pølseskvis, jamfør det gamle jungelordet som seier at det er umogleg å halde rett mot ein sjukortsfarge.
Martin Schaltz stakk korrekt med kløver ess i fyrste stikk, og drog deretter trumfen heilt til botnen. Allereie på den andre augna han nok håp, då vest kasta hjarter konge, sterk indikasjon på ein botnsolid farge.
Ruterleksa skvisa vest ubønhøyrleg; på den siste ruteren hadde han valet mellom å kaste frå seg hjarterhaldet eller å gå ned på dobbel spar. Sistnemnde dårlege alternativ gjorde det mogleg for Schaltz å godspela eit ekstra sparstikk, kontraktstikket.
På det andre bordet hoppa Boye Brogeland friskt, men praktisk inn med 4 hjarter over 1 ruter. Den kontrakten fekk han spela, og gjekk der to beit. Det sikra 7 IMP inn og avansement for lag Rosenthal.
Av Erlend Skjetne
1) Minst 5-5 i major