Makkeren din opnar i fyrste hand med 1 hjarter, og du melder naturleg 2 kløver. Makker melder 2 grand, 12–14 balanserte, og i BIN standard er 3 hjarter no ei normal melding, som krav og sleminvitt. Sør kontrollmelder 3 spar, altså har han nok spar konge. Med kontroll i alle sidefargar kan du like gjerne melde Blackwood. Du får 5 hjarter, to ess utan trumf dame. Kva no?
Med ein steleverdi er det lett å tenkje at 6 hjarter er det naturlege, men ein bør prøve å telja stikk. Det er altså minst to toppstikk i høvesvis ruter og spar. Så har ein tri toppstikk i kløver, og er oppe i sju. Går hjarteren, er ein straks på tolv. Går han ikkje, gjeld jo dette både i hjarter og grand. Det kan sjølvsagt, på ein dårleg dag, vera slik at det er tretten stikk i hjarter på grunn av ei sparsteling i bordet, og berre tolv i grand. Men sør har fort noko meir enn spar konge og ess, konge og eventuelt knekt i hjarter. Dessutan er det ein sjanse for at kløveren rullar, jamvel mot to småe i sør. Dimed kan det faktisk vera slik at 6 grand står medan 6 hjarter er beit, om hjarteren sit skeivt.
Aktuelt gav 1020 ren topp, men du ser kanskje òg kva kontrakt som er endå betre nord–sør? 7 kløver er nedlegg ved å kaste ein hjarter på spar konge, stela god hjarteren og seinare hente han til ruteravkast. Men eg veit verkeleg ikkje korleis storeslem i kløver skal kunne meldast i eit naturleg system; hjartertilpassinga er liksom litt i vegen. Kanskje du og makkeren din sit på løysinga?
Av Erlend Skjetne
1) Kontrollmelding
2) To ess utan trumf dame